Këpucët me takë: histori dhe modë

                          

E premtja është dita për një shkrim të ri në blog🙂

Këpucët me takë, prej shekujsh, janë një ndër llojet më të pëlqyera të këpucëve. Nga këpucët e përditshme e deri te llojet e pazakonta, kanë një rol të rëndësishëm në stil dhe simbolikë. Kjo është një përmbledhje e historisë dhe modës së këpucëve me takë.

Për të mësuar më shumë mbi historinë e tyre, kthehemi pas disa shekuj e më saktësisht në të 10-in. Në Persi, llojet e para u krijuan si mënyrë për të mbajtur këmbët në yzengji gjatë kalërimit. Ndërsa në shekullin e 14-të, përdoreshin nga gratë veneciane, për t`iu shmangur papastërtive dhe ndotjes së rrugëve. Më vonë, në shekujt e 17-të dhe 18-të, filloi përdorimi më i gjerë në të gjithë Europën.

Në vitet 1700, mbreti francez Louis XIV i përdorte këpucët me takë për të treguar statusin e tij. Më pas, elitat filluan t`i vishin për tu dalluar nga shtresa e ulët e popullsisë. Me ardhjen e Iluminizmit, këpucët me takë u ndaluan së veshuri nga burrat. Pas disa vitesh, gratë filluan të veshin më shumë këtë lloj këpuce, që simbolizonte ekstravagancë.

Rreth viteve 1850 u krijua makina e parë qepesë e këpuceve. Ishte një moment me rëndësi sepse u shtua e përmirësua prodhimi i këpucëve me takë. Gjatë periudhës së luftrave botërore kishte sasi të pakët materialesh për këtë lloj kepuce, ndërkohë që i jepej rëndësi prodhimit të këpucëve ushtarake. Në mesin e viteve 1900, posterat dhe revistat e modës i shtynë njerëzit të interesohen më shumë se çfarë do të veshin.

Ndër vite janë prodhuar lloje të ndryshme këpucësh me takë. Ndryshimi mes tyre varet nga lloji e gjatësia e takës dhe forma e këpucës. Sa i përket materialit që përdoret për t`i bërë, më të preferuarat janë: lëkurë e llojeve të ndryshme, tekstilet dhe plastika. Thuajse çdo vit krijohen modele të veçanta këpucësh më takë, për shkak të propozimeve nga shtëpitë e mëdha të modës dhe kërkesave të blerësve.

Në shekullin e 21-të, ekzistojnë rregulla të ndryshem sa i përket këpucëve. I jepet rëndësi simbolikës së këpucëve me takë, që lidhet me feminilitetin dhe elegancën. Shumë herë shikohet si normë e stilit të punës. Njëkohësisht, njerëzit janë më të lirë të zgjedhin lloje të ndryshme këpucësh më të rehatshme e praktike për çdo rast.

Sa i përket këtij viti, për këpucët me takë mbizotërojnë disa trende: taka shumë e ulët, shapkat me pak takë, sandale me taka të ndryshme.

 

Shkrime të tjera  ✍️    https://notesofiris.blogspot.com/